TANBA SÁ FETO TANIS?

Labarik mane-oan ida husu nia inan “tanba sá mamá tanis?”  

Nia inan hatán  ba nia nune’e, "tanba ha’u feto ida”.

Labarik ne’e dehan, "ha’u la kompriende".

Nia inan hakuak nia no dehan, “ó sei la kompriende kona ba ne’e”.

Depois, loron ida labarik mane ne’e husu ba nia aman, "Tanba sá mamá gosta tanis la ho razaun ida?”

"Feto hot-hotu ne’e tanis la ho razaun”, nia aman hatán nune’e de’it.

Labarik ne’e mós boot ba daudaun sai mane maduru ida. Maibé nia hakarak nafatin atu hatene segredu tanba sá feto tanis.

Ikus mai nia harohan ba Maromak no husu, “Na’i, tanba sá feto sira fasil liu tanis?”

Iha ninia hakmatek ne’e, Maromak hatán ba nia dehan:

"Bainhira Ha’u kria feto ida, nia tenke sai ema ne’ebé privilejiadu. Ha’u halo nia kabaas forte atu hasan netik mundu, maibé tenke suave ka mamar hodi fó konfortu”.

"Ha’u fó kbiit husi laran nune’e nia bele fó kosok-oan ba mundu no maski nia hetan ignoránsia dala barak mai hosi nia oan sira”.

"Ha’u fó ba nia sensu-forte nune’e halo nia bele forsa nafatin bainhira ema seluk ne’ebé rende ba moris, no tau-matan ba nia família ho susar no kolen maibé la sura.

"Ha’u fó ba nia sensibilidade hodi hadomi nia oan sira iha kondisaun saida de’it, mezmu dala ruma nia oan sira hatudu atitude ne’ebé hamoras nia fuan".

"Ha’u fó ba nia kbiit no forsa hodi suporta ninia la’en hosi nia fallansu sira no kompleta nia la’en nia kosteleta hodi próteze ninia fuan.

"Ha’u fó ba nia sabedouria (wisdom) hodi hatene didi’ak katak la’en di’ak, nia nunka atu hakanek feen nia fuan, maibé dala ruma koko ninia kbiit no determinasaun fuan nune’e iha nia la’en nia sorin la ho laran dúvida.

"No ikus mai, Ha’u fó ba nia matabeen hodi tanis. Ida ne’e própriu ba nia no ninian kedas hodi uza iha sá tempu de’it bainhira presiza.

"Ó hatene: beleza feto ida nian la haree hosi nia hatais, hosi nia isin ne’ebé hatudu, ka hosi nia fuuk”.

"Beleza feto ida nian tenke haree hosi nia matan, tanba matan mak odamatan ba nia fuan, fatin iha ne’ebé domin hela bá”.

Feto nia murak no kmo’ok la’ós haree hosi nia oin kabeer. Maibé iha ninia murak absoluta ne’ebé sai hosi nia fuan, nakonu ho  kompaixaun ne’ebé oferese tau-matan no domin. No nune’e beleza ne’e sei to’o moris rohan laek. @D. Assis