REFLESAUN LAIHA TÍTULU

Ita nia jornada moris ne’e la’ós fasil hanesan buat ne’ebé ita hanoin hela no dala barak kontráriu ho fali ita nia hakarak. Dala ruma hamosu sentimentu deskontente ba ita nia an, maibé ita nunka sente katak ida ne’e mak moris nu’udar sobrevivente ida iha mundu. 

Iha tempu atu ita hasoru duni problema no dezafiu sira. Laiha ema ida hasees-an husi problema, nia mai nunka avizu ka husu lisensa uluk ba ita katak ita prontu ona atu hasoru ka lae? Problema mosu mai ataka ema hotu, tantu riku eh ki’ak, boot ka ki’ik, ferik ka katuas. 

Ne’ebé-iha-leten-aas-bá, nunka promete ba ita kona ba moris la ho problema, maibé buat ne’ebé nia prepara hela ba ita mak kbiit atu hasoru no solusaun ba dezafiu ka problema ida.  

Nune’e, troka ita nia pontu de vista ne’ebé dehan problema ka dezafiu ne’e hanesan terus ka susar ida mai ita. No mós labele foku de’it ba problema ne’e tanba nia impaktu mak stress no depresaun. 

Presiza iha hanoin pozitivu ba hotu ne’ebé ita hetan ka hasoru. Tanba depois ita liu tiha dezafiu ka problema ne’e, sei mosu buat di’ak ruma. Nune’e mós halo ita sai maduru liu tan iha ita nia moris no haforsa ita nia fiar, no dezenvolve ita nia an ba oin nafatin. La presiza ta’uk ho dezafiu sira mosu mai. Tanba iha situasaun difisil nian, Na’i sei akompaña no sei fó solusaun di’ak ba ita. 

☺be a positive ♥